Mörg hinna stóru trúarbragða heimsins hafa hneigst til þess að afla sér fylgis og áhrifa með því að hafna sannleiksgildi annarra trúarbragða og gera tilkall til þess að sitja uppi með allan sannleika í trúarefnum.

Samkvæmt bahá‘í trúnni eru öll opinberuð trúarbrögð sögunnar komin frá einum og sama Guði. Með opinberuðum trúarbrögðum er átt við trúarbrögð sem styðjast við ritningar og opinberanda sem gerir tilkall til þess að flytja mönnunum boðskap og leiðsögn frá Guði. Trúarbrögðin hafa leitt mannkynið stig af stigi til andlegs og siðferðilegs þroska með atbeina þessara opinberenda.

Andlegar kenningar um frið, réttlæti og ást meðal manna eru eilíf sannindi og innsti kjarni allra trúarbragða. Nýr opinberandi Guðs endurnýjar þennan eilífa sannleika en flytur mönnunum einnig  nýja sýn og nýja leiðsögn sem er í samræmi við andlegan þroska og félagslegar aðstæður þeirrar kynslóðar sem hann dvelur með. Þessi leiðsögn er löguð að ytri og innri þörfum manna á hverjum tíma á sama hátt og foreldri mætir þörfum barna sinni með mismunandi leiðsögn í samræmi við þroska þeirra á hverju aldurskeiði.

Bahá’u’lláh segir að mannkynið sé að verða fullveðja. Það verði að hverfa frá gömlum venjum og taka upp nýtt heimsskipulag sem byggist á einingu, ást og þjónustu við sameiginlega hagsmuni alls mannkyns. Hann sagði: „Velferð mannkyns, friður þess og öryggi, verður aldrei að veruleika fyrr en eining þess hefur verið tryggilega grundvölluð“